前言: 一日情旅嘅宗旨係希望各位豬仔豬女，每星期都可以參考下我哋幫你準備嘅節目，咁就唔使嘥時間左諗右諗啦！ (每星期努力更新)
有時大家放假係咪要諗唔到去邊呢？
今日就帶大家黎到啟德嘅郵輪碼頭，呢個咁靚 咁舒服嘅地方就夠我hea足一日啦！
佔地十萬呎郵輪碼頭，綜合娛樂休閒商業嘅地點，免費無敵海景！
PickMe岀發指南：
時間：13:00
地點：九龍灣/觀塘
搵到個咁正嘅地點，但點去啊？呢到附近最近嘅港鐵站就係牛頭角站，但行過黎都要差唔多45分鐘。所以我都比一個方便快捷嘅方法大家，大家可以係九龍灣站經過徳福商埸再轉小巴過黎，咁會快好多ga！
晏晝可以係附近嘅德福商場新開嘅Food Court，有齊中美，日韓嘅美食買啲野過黎。如果大家覺得大多選擇，揀唔到，可以考慮下呢間 Chicken 852，佢嘅炸雞真係好正啊！
買完就可能搭車過黎。
黎到一邊食，一邊享受住咁靚嘅景觀，冇得頂啊！
食完野，可以係到hea一陣，抖下，如果鍾意睇書嘅你都不妨帶本書黎睇下，靜靜地都唔錯ga。又或者同另一半傾下計都幾好啊！
附近有個啟德跑道公園，如果有養開寵物，不妨帶埋你隻貓仔狗仔過黎盡情咁玩啦！
Hea 到差唔多，係時候要郁一郁啦！到差唔多太陽落山，冇咁曬，就可以跑下步，做下運動。呢到都有緩跑徑比大家跑下步。再享受咁靚嘅日落，真係滿足啊！當然要同另一半黎張自拍啦！
同埋，呢個公園開放時間都係去到夜晚七點，想睇夜景可能就要轉場去附近嘅觀塘海濱公園啦！如果大家想去觀塘海濱公園睇埋夜景都唔錯ga，夜晚禁堂食、限聚令期間同另一半買外賣過去食都好浪漫啊！
Pick Me 評分: 7分
餐廳資料
店名: Foodeli
地址:九龍灣偉業街 33 號德福廣場二期 5 樓
郵輪碼頭
地址：九龍城啟德承豐道33號
觀塘海濱公園
地址：觀塘海濱道80號
其他資料
1. 啟徳跑道公園假日通常都會較多人，記得早啲去霸位啊
2. 除左以上嘅方法去郵輪碼頭，大家岀發前都可以睇睇有冇城巴22/22M，都可以直達郵輪碼頭啊！
3. 如果想影日落，記得早啲搵定位啊，因為要影到靚嘅日落嘅位都唔多。
*部分圖片及資料取材自網上
Comments